Головна > --- > Звернення Свалявської пліткарки до краян!
Звернення Свалявської пліткарки до краян!4-05-2017, 09:00. Розмістив: redaktor |
|
Добрий вичур, свалявчани і всі файні люде! Не часто вам пишу, йсе правда. Так ся стало. Знаєте, хожу я по городу та й думаву си усе єдно - коли вже туй даякий порядок буде? Коли бодай за штось мош буде доброє написати, бо поганого нич не лишиться? Йой, не знаву-не знаву, чи доживу я колись до того? Замість того на нишній динь: улиці у нас такі, таяк би по ним міни лупили. Ями до колін. Поремонтовати путь до тина та й доста. А щи дуже ми ся полюбили, як удовбали ями коло автовокзала дись місяць тому. Пак прошлий тиждінь ізась удовбали, а ще й коло базара тоже штось довбали і, майже заболи, ош то треба заасвальтовати. Чи може дощ файний чекавуть? Авадь як у Тибаві - сніг? Тротуари у нас не ліпші. Ноги мош поламати коло базара та й у принципі всяґде. Єдинственний тротуар, який налажувуть, то коло Гратіса. Надівуся за рахунок власника зданія. Они же чесні і справедливі бізнесмени? Они же всьо для города зробити хочуть? А міст і нині там (як у тів басні). Нагнутий і скособочений. Тот, што обіцяли з весни начати ремонтувати. Лем не уточнили рік. Бо йсів весні вже скоро кониць, а туй я шось ниякого двіженія не наблюдаву. Майже оп'ять треба аби Мішкобачі, тот што грузін в гості прийшов. Бо нараз і гроші начали уділяти, і бодай дашто киватися. А типирь оп'ять тишина. Каждоє чудо держить три дні. Йсе докіть Драчинський міст стойить. Хоч як побзераву кілько машин, фур і лісовозів по ньому ходить, то недовго він простойить, чує моє серце. За лісовози, то окрема історія. Знаєте, я позираву кілько дерева ся возить і рубать, то аж страшно ми. І никому до того діла неє. Скоро хащі ся не лишить довкус. І на гриба ніде буде піти - єдні гори лисі ся лишать. А ми мовчім, а што нам. Інтересно, а тко має контролювати вирубку. Де наші лісники? Чи главноє гроші, а там після нас хоч і пустиня з потопом? Може кіби їхні хижі пару раз файно затопило при повені або з глиною зсунуло, то иншак би думали? Тко знає. Нич файного вам не уповім. Нич радісного. Бо я такого не вижу. Може хоч ви ми дашто уповісте? Бола би м рада. Як усе, Робім наш город ліпшим, бо тко як не ми? Ваша, Пліткарька.скачать dle 11.3 Повернутися назад |